ਅੱਜ ਦੇ ਮੁਕਾਬਲੇ ਦੇ ਯੁੱਗ ਵਿਚ ਜਦ ਕਿ ਹਰ ਖੇਤਰ ਵਿਚ ਪੈਸੇ ਅਤੇ ਸਸਤੀ ਸ਼ੋਹਰਤ ਬਦਲੇ ਹਰ ਕੋਈ ਦੂਜੇ ਨੂੰ ਠਿੱਬੀ ਮਾਰਕੇ ਅੱਗੇ ਲੰਘਣ ਦੀ ਕੋਸ਼ਿਸ਼ ਵਿਚ ਹੈ, ਸਾਹਿਤ ਤੇ ਸੱਭਿਆਚਾਰਕ ਖੇਤਰ ਵਿਚ ਵਿਚਰਦਿਆਂ ਲੋਕ-ਦਿਲਾਂ ਉਤੇ ਰਾਜ ਕਰਨਾ, ਐਰੇ ਗੈਰੇ ਨੱਥੂ ਖੈਰੇ ਦੇ ਵਸ ਦੀ ਗੱਲ ਨਹੀਂ ਰਹਿ ਗਈ। ਪਰ ਜਿਸ ਸਖ਼ਸ਼ ਦਾ ਇਨ੍ਹਾਂ ਸਤਰਾਂ ਦੁਆਰਾ ਜ਼ਿਕਰ ਕਰਨ ਜਾ ਰਹੇ ਹਾਂ, ਉਸ ਦੀ ਕੀਤੀ ਤਪੱਸਿਆ ਨੂੰ ਸੁਹਣਾ ਭਰਵਾਂ ਬੂਰ ਪੈ ਰਿਹਾ ਹੈ। ਮੇਰੀ ਮੁਰਾਦ ਹੈ ਗੀਤਕਾਰ, ਗਾਇਕ, ਅਦਾਕਾਰ ਅਤੇ ਪ੍ਰਮੋਟਰ ਰਵੀ ਮਾਨ ਤੋ, ਜਿਹੜਾ ਕਿ ਸੱਚੇ ਦਿਲੋਂ ਸਾਹਿਤ ਤੇ ਸੱਭਿਆਚਾਰ ਨੂੰ ਸਮਰਪਿਤ ਹੈ। ਸਖਤ ਤਪੱਸਿਆ ਨੇ ਉਸਨੂੰ ਮੰਜ਼ਲਾਂ ਸਰ ਕਰਨ ਦਾ ਬਲ ਸਿਖਾ ਦਿੱਤਾ ਹੈ। ਮਿਹਨਤੀ, ਮਿਲਾਪੜੇ ਤੇ ਨੇਕ ਦਿਲ ਇਨਸਾਨ ਇਸ ਰਵੀ ਦਾ ਜਨਮ ਮਾਤਾ ਸ੍ਰੀਮਤੀ ਕਮਲਾ ਦੇਵੀ ਦੀ ਪਾਕਿ ਕੁੱਖੋਂ ਪਿਤਾ ਸ੍ਰੀ ਮੋਹਨ ਲਾਲ ਜੀ ਦੇ ਗ੍ਰਹਿ ਵਿਖੇ ਜਲੰਧਰ ਸ਼ਹਿਰ ਵਿੱਚ ਹੋਇਆ। ਇਕ ਮੁਲਾਕਾਤ ਦੌਰਾਨ ਰਵੀ ਨੇ ਦੱਸਿਆ ਕਿ ਸਕੂਲ ਟਾਇਮ ਤੋਂ ਹੀ ਉਸਨੂੰ ਗੀਤ ਲਿਖਣ, ਗਾਉਣ ਅਤੇ ਸਟੇਜੀ ਪ੍ਰੋਗਰਾਮਾਂ ਵਿੱਚ ਭਾਗ ਲੈਣ ਦਾ ਸ਼ੌਂਕ ਜਾਗ ਪਿਆ ਸੀ, ਜਿਹੜਾ ਕਿ ਕਾਲਜ ਤੱਕ ਹੋਰ ਵੀ ਸਰਗਰਮੀ ਫੜਦਾ ਗਿਆ। ਉਸ ਨੇ ਕੰਪੀਟੀਸ਼ਨਾਂ ਵਿਚ ਕਈ ਅਵਾਰਡ ਵੀ ਜਿੱਤੇ। ਗਾਇਕੀ ਦੇ ਨਾਲ-ਨਾਲ ਉਸ ਨੇ ਕਈ ਗਾਇਕਾਂ ਦੀਆ ਪੰਜਾਬੀ ਵੀਡੀਓ ਵੀ ਬਣਾਕੇ ਗਾਇਕਾਂ ਨੂੰ ਲੋਕਾ ਦੇ ਰੂ-ਬ-ਰੂ ਕੀਤਾ।
ਰਵੀ ਮਾਨ ਦੇ ਗੀਤਕਾਰੀ ਖੇਤਰ ਵੱਲ ਝਾਤ ਮਾਰਿਆਂ ਪਤਾ ਲੱਗਦਾ ਹੈ ਕਿ ਦਿਲਰਾਜ ਖੈੜਾ, ਨੁਸਰਤ ਅਲੀ ਖਾਨ, ਲੱਕੀ ਕੱਦੋ, ਦਿਲਸਾਨ, ਪਵਨ ਪੰਜਾਬੀ, ਡਾ ਜੋਨ, ਦਿਲਵੀਰ ਸ਼ੌਂਕੀ, ਡਿੰਪਲ ਰਾਜਾ, ਅਸਲਮ ਅਲੀ, ਲਾਡੀ ਗਿੱਲ, ਜਮੀਲ ਅਖਤਰ, ਸੰਜੇ ਧਾਰੀਵਾਲ, ਦਿਲਬਾਗ ਸਿੰਘ, ਸੁਰਜੀਤ ਸੂਫੀ, ਸਨੀ ਗਿੱਲ ਤੇ ਲੱਕੀ ਸਿੰਧੂ ਆਦਿ ਵਰਗੇ ਅਨੇਕਾਂ ਗਾਇਕ-ਗਾਇਕਾਵਾਂ ਉਸਦੇ ਲਿਖੇ ਹੋਏ ਗੀਤ ਗਾ ਚੁੱਕੇ ਹਨ।
ਪੰਜਾਬੀ ਫਿਲਮਾਂ ਦੇ ਹੀਰੋ ਵਰਿੰਦਰ ਜੀ ਨੂੰ ਆਪਣਾ ਗੁਰੂ ਮੰਨਣ ਵਾਲਾ ਰਵੀ ਮਾਨ, ‘ਆਖਰੀ ਸਲਾਮ’, ‘ਕਬਰਾਂ ’ਚ ਬੰਬ’, (ਕਮੇਡੀ ਟੈਲੀ ਫਿਲਮ), ‘ਕਾਸ਼ ਮੈਂ ਕੁੜੀ ਹੁੰਦਾ’ (ਟੈਲੀ ਫਿਲਮ) ਤੇ ‘ਧੀਆਂ’ (ਫੀਚਰ ਫਿਲਮ ਪੰਜਾਬੀ) ਆਦਿ ਵਿਚ ਆਪਣੀਆਂ ਭਰਵੀਆਂ ਹਾਜ਼ਰੀਆਂ ਲੁਆ ਚੁੱਕਾ ਹੈ। . . . ਇੱਥੇ ਹੀ ਬਸ ਨਹੀ, ਉਹ ਅਨੇਕਾਂ ਪੰਜਾਬੀ ਗਾਇਕਾਂ ਨੂੰ ਦੇਸਾਂ ਵਿਦੇਸ਼ਾਂ ਵਿੱਚ ਪ੍ਰਮੋਟ ਕਰਨ ਦਾ ਵੀ ਨਾਮਨਾ ਖੱਟ ਚੁੱਕਾ ਹੈ, ਜਿਨ੍ਹਾਂ ਵਿਚ, ਦਲਵਿੰਦਰ ਦਿਆਲਪੁਰੀ, ਡਿੰਪਲ ਰਾਜਾ (ਅਵਾਜ਼ ਪੰਜਾਬ ਦੀ), ਅਮਰਿੰਦਰ ਬੌਬੀ, ਅਸਲਮ ਅਲੀ (ਅਵਾਜ਼ ਪੰਜਾਬ ਦੀ), ਅਨਮੋਲ ਗਗਨ ਮਾਨ, ਜੀ. ਸ਼ਰਮੀਲਾ, ਸੋਹਣ ਸ਼ੰਕਰ, ਪਰਿੰਸ ਸੁਖਦੇਵ, ਰਾਣੀ ਰਣਦੀਪ, ਸੁਰਜੀਤ ਸੂਫੀ, ਹਰਜੋਤ ਢਿੱਲੋਂ, ਅੰਦਾਜ਼ ਖਾਨ, ਮਮਤਾ ਪ੍ਰੀਤ, ਮਨੋਹਰ ਧਾਲੀਵਾਲ, ਜਸਮੀਤ ਜੱਸੀ, ਭਾਰਤੀ ਸ਼ਰਮਾ, ਰਹਿਮਤ ਅਲੀ, ਸਨੀ ਗਿੱਲ, ਪਵਨ ਪੰਜਾਬੀ, ਰਾਜੀ ਮਾਨ, ਜੋਤੀ ਸੂਰੀ, ਮਨਜੀਤ ਬੁੱਟਰ, ਦਿਲਰਾਜ ਖੇੜਾ, ਵੀਰ ਸੁਖਵੰਤ, ਵਣਜਾਰਾ ਜੋਗੀ, ਅਮਨ ਗਰੇਵਾਲ, ਅਕਾਸ਼ ਲਵਲੀ, ਲੱਕੀ ਸਿੱਧੂ, ਜਸਵੀਰ ਕਮਾਂਡੋ, ਪ੍ਰੀਤੀ ਖੋਸਾ (ਕਨੇਡਾ), ਮਨਪ੍ਰੀਤ ਮੁਲਤਾਨੀ, ਸੋਨੂ ਮੱਟੂ, ਮੋਨੂ ਪ੍ਰੀਤ, ਕਮਲ ਹੰਸ, ਰਣਜੀਤ ਸੰਧੂ, ਰਾਜੇਸ਼ ਸੱਭਰਵਾਲ, ਜੀਵਨ ਮਾਨ, ਵੀਰੂ ਚੀਮਾ, ਚਮਕੌਰ ਹੰਸ, ਹਰਪ੍ਰੀਤ ਰਾਜਿਸਥਾਨੀ ਅਤੇ ਮਾਧੋਪੁਰੀ ਚਮਕੀਲਾ (ਸਪੇਨ) ਆਦਿ ਅਨੇਕਾਂ ਕਲਾਕਾਰ ਸ਼ਾਮਲ ਹਨ। ਰਵੀ ਮਾਨ ਪ੍ਰਮੋਟਰ ਦੇ ਤੌਰ ਤੇ ਦੇਸ਼ਾਂ ਵਿਦੇਸ਼ਾਂ ਵਿੱਚ ਤਾਂ ਪੰਜਾਬੀ ਸ਼ੋਅ ਕਰਵਾਉਂਦਾ ਹੀ ਹੈ, ਪਰ ਨਾਲ ਦੇ ਨਾਲ ਪੰਜਾਬ ਵਿੱਚ ਵੀ ਕਈ ਥਾਵਾਂ ਤੇ ਪੰਜਾਬੀ ਮੇਲੇ ਕਰਵਾ ਚੁੱਕਾ ਹੈ, ਉਹ। ਮਾਨ ਨੇ ਦੱਸਿਆ ਕਿ ਇਸ ਵਕਤ ਉਸ ਦੇ ਕਈ ਪਰੋਜੈਕਟ ਤਿਆਰ ਹਨ ਜੋ ਬਹੁਤ ਹੀ ਜਲਦੀ ਲੋਕਾਂ ਦੇ ਰੂ-ਬ-ਰੂ ਉਹ ਲੈਕੇ ਹਾਜ਼ਰ ਹੋਵੇਗਾ।
ਸ਼ੀਲਡਾਂ ਇਕੱਠੀਆਂ ਕਰਨ ਦੇ ਪੱਖ ਵਿਚ ਕਨੇਡਾ ਐਸੋਸੀਏਸ਼ਨ, ਸਪੋਰਟਸ ਕਲੱਬ ਕਨੇਡਾ, ਪੰਜਾਬੀ ਮਾ-ਬੋਲੀ ਮੇਲਾ ਟਰਾਂਟੋ, ਲੋਹੜੀ ਧੀਆ ਦੀ (ਯੂ ਐਸ. ਏ.), ਭੰਗੜਾ ਐਸੋਸੀਏਸ਼ਨ ਕਲੱਬ (ਯੂ ਐਸ. ਏ.) ਤੇ ਪੰਜਾਬੀ ਸਹਿਤ ਸਭਾ (ਯੂ ਐਸ. ਏ.) ਆਦਿ ਅਨਗਿਣਤ ਸਟੇਜਾਂ ਤੋਂ ਸਨਮਾਨਿਤ ਰਵੀ ਮਾਨ ਆਪਣੀ ਜੀਵਨ-ਸਾਥਣ ਸ੍ਰੀਮਤੀ ਪੂਜਾ ਮਾਨ ਤੇ ਬੇਟੀ ਦਿਸ਼ਾ ਮਾਨ ਨਾਲ ਖੁਸ਼ੀਆਂ ਭਰੀ ਜ਼ਿੰਦਗੀ ਬਤੀਤ ਕਰਦਾ ਸਾਹਿਤਕ ਤੇ ਸੱਭਿਆਚਾਰਕ ਖੇਤਰ ਦੀਆਂ ਉਚੀਆਂ ਉਡਾਣਾ ਮਾਪ ਰਿਹਾ ਹੈ। ਕਨੇਡਾ ਦੀ ਧਰਤ ’ਤੇ ਡੇਰੇ ਲਾਈ ਬੈਠਣ ਦੇ ਬਾਵਜੂਦ ਵੀ ਉਹ ਦਿਮਾਗੀ ਤੌਰ ਤੇ ਪੰਜਾਬ ਦੇ ਪਿੰਡਾਂ, ਸ਼ਹਿਰਾਂ ਤੇ ਕਸਬਿਆਂ ਦੀਆਂ ਗਲੀਆਂ ਵਿਚ ਹੀ ਗੇੜੀਆਂ ਮਾਰਦਾ, ‘ਜਾਗਦੇ ਰਹੋ’ ਦਾ ਹੋਕਾ ਦਿੰਦਾ ਰਹਿੰਦਾ ਹੈ। ਰੱਬ ਕਰੇ! ਪ੍ਰਮੋਟਰ, ਗੀਤਕਾਰ, ਗਾਇਕ ਤੇ ਅਦਾਕਾਰ ਰਵੀ ਮਾਨ ਇਵੇਂ ਹੀ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਨਾਲ ਜੁੜਿਆ ਆਪਣੇ ਵੱਡਮੁੱਲੇ ਸੱਭਿਆਚਾਰਕ ਨੂੰ ਵਿਸ਼ਵ ਭਰ ਵਿਚ ਫੈਲਾਉਂਦਾ, ਸ਼ੋਹਰਤ ਦੇ ਅੰਬਰਾਂ ਨੁੰ ਜਾ ਛੂਹਵੇ।
-ਪ੍ਰੀਤਮ ਲੁਧਿਆਣਵੀ (ਚੰਡੀਗੜ੍ਹ), 9876428641
ਸੰਪਰਕ : ਰਵੀ ਮਾਨ, ਕਨੇਡਾ, +1(604)-260-9061
ਹਰਜਿੰਦਰ ਸਿੰਘ ਬਸਿਆਲਾ- ਆਕਲੈਂਡ- ਕਹਿੰਦੇ ਨੇ ਕਿਸੇ ਕੰਮ ਲਈ ਲਗਾਤਾਰ ਯਤਨ ਕਰਦੇ ਰਹਿਣਾ ਕੋਈ ਤਾਕਤ ਜਾਂ ਬੁੱਧੀ ਨਹੀਂ, ਸਗੋਂ ਇਹ ਸਾਡੀ ਸਮਰੱਥਾ ਨੂੰ ਖੋਲ੍ਹਣ ਦੀ ਕੂੰਜੀ ਹੁੰਦਾ ਹੈ। ਨਿਊਜ਼ੀਲੈਂਡ ਦੀ ਇਕ ਸਿੱਖ ਸੰਸਥਾ ‘ਸਿੱਖ ਅਵੇਅਰ’ ਸਿੱਖ ਭਾਈਚਾਰੇ ਦੀਆਂ ਤਕਨੀਕੀ ਮੁਸ਼ਕਿਲਾਂ ਨੂੰ ਕਾਨੂੰਨੀ ਸੰਦਰਭ ਦੇ ਵਿਚ ਵੇਖ ਉਸਦੇ ਸਾਰਥਿਕ ਹੱਲ ਲੱਭਣ ਲਈ ਯਤਨਸ਼ੀਲ ਰਹਿੰਦੀ ਹੈ। ਹੁਣ ਸਿੱਖ ਭਾਈਚਾਰੇ ਨੂੰ ਇਸ ਗੱਲ ਦੀ ਖੁਸ਼ੀ ਹੋਵੇਗੀ ਕਿ ਹੁਣ ਨਿਊਜ਼ੀਲੈਂਡ ਦੇ ਵਿਚ 1 ਮਈ 2021 ਤੋਂ ਬਿਨਾਂ ਹੈਲਮਟ ਸਾਈਕਲ ਚਲਾਉਣ ਲਈ ਟਰਾਂਸਪੋਰਟ ਵਿਭਾਗ ਤੋਂ ਅਗਾਊਂ ਆਗਿਆ (ਚਿੱਠੀ) ਨਹੀਂ ਲੈਣੀ ਪਿਆ ਕਰੇਗੀ। ਇਸ ਤੋਂ ਪਹਿਲਾਂ ਇਹ ਸਹੂਲਤ ਮੋਟਰਸਾਈਕਲ ਚਲਾਉਣ ਵੇਲੇ ਹੀ ਸੀ। ਸਾਈਕਲ ਵਾਲੀ ਚਿੱਠੀ ਵੀ ਆਪਣੇ ਕੋਲ ਵੀ ਰੱਖਣੀ ਹੁੰਦੀ ਸੀ। ‘ਸਿੱਖ ਅਵੇਅਰ’ ਨੇ ਲੇਬਰ ਪਾਰਟੀ ਦੀ ਸਰਗਰਮ ਮੈਂਬਰ ਬਲਜੀਤ ਕੌਰ ਦੀ ਸਹਾਇਤਾ ਦੇ ਨਾਲ ਇਹ ਮਾਮਲਾ ਸਰਕਾਰ ਦੇ ਧਿਆਨ ਵਿਚ ਲਿਆਉਂਦਾ ਸੀ। ਬੀਤੇ ਦਿਨੀਂ ਕਾਨੂੰਨੀ ਤਬਦੀਲੀ ਹੋਣ ਤੋਂ ਬਾਅਦ ਅੱਜ ਇਸ ਸਬੰਧੀ ਟਰਾਂਸਪੋਰਟ ਮੰਤਰੀ ਸ੍ਰੀ ਮਾਈਕਲ ਵੁੱਡ ਦੇ ਨਾਲ ਸਿੱਖ ਅਵੇਅਰ ਤੋਂ ਸ. ਹਰਪ੍ਰੀਤ ਸਿੰਘ, ਸ. ਗੁਰਦੀਪ ਸਿੰਘ ਅਤੇ ਸ. ਸਨਮੀਤ ਸਿੰਘ ਹੋਰਾਂ ਨੇ ਧੰਨਵਾਦੀ ਮੁਲਾਕਾਤ ਕੀਤੀ। ‘ਸਿੱਖ ਅਵੇਅਰ’ 2018 ਤੋਂ ਇਸ ਮਾਮਲੇ ਦੀ ਪੈਰਵਾਈ ਕਰ ਰਿਹਾ ਸੀ ਕਿ ਮੋਟਰ ਸਾਈਕਲ ਵਾਲੇ ਨਿਯਮ ਸਾਈਕਲ ਚਲਾਉਣ ਉਤੇ ਵੀ ਲਾਗੂ ਕੀਤੇ ਜਾਣ ਦੀ ਮੰਗ ਕਰ ਰਿਹਾ ਸੀ। ਇਸ ਦੌਰਾਨ ਮੰਤਰੀ ਵੀ ਬਦਲਦੇ ਗਏ, ਮਾਮਲਾ ਲੰਬਾ ਹੁੰਦਾ ਚਲਾ ਗਿਆ ਅਤੇ ਫਿਰ ਜਨਤਕ ਪੱਖ ਵੀ ਜਾਣਿਆ ਗਿਆ। ਸਾਰਾ ਕੁਝ ਲੰਬੀ ਮਿਹਨਤ ਮੁਸ਼ੱਕਤ ਹੋਣ ਬਾਅਦ ਹੁਣ ਹੁਣ ਸਿੱਖ ਅਵੇਅਰ ਵੱਲੋਂ ਟਰਾਂਸਪੋਰਟ ਮੰਤਰੀ ਸ੍ਰੀ ਮਾੀਕਲ ਵੁੱਡ ਦਾ ਧੰਨਵਾਦ ਕੀਤਾ ਗਿਆ ਹੈ।ਵਰਨਣਯੋਗ ਹੈ ਕਿ 1 ਜਨਵਰੀ 1994 ਤੋਂ ਇਥੇ ਸਾਈਕਲ ਚਲਾਉਣ ਲਈ ਹੈਲਮਟ ਪਹਿਨਣਾ ਜਰੂਰੀ ਕੀਤਾ ਗਿਆ ਸੀ। ਹੈਲਮਟ ਨਾ ਪਹਿਨਣ ’ਤੇ 55 ਡਾਲਰ ਜ਼ੁਰਮਾਨਾ ਜਾਂ ਫਿਰ ਅਦਾਲਤੀ ਚੱਕਰਾਂ ਵਿਚ 500 ਡਾਲਰ ਤੱਕ ਜ਼ੁਰਮਾਨਾ ਹੋ ਜਾਂਦਾ ਹੈ। ਸਾਈਕਲ ਦੇ ਪਿੱਛੇ ਬੈਠਣ ਵਾਲੇ ਵਾਸਤੇ ਵੀ ਹੈਲਮਟ ਜਰੂਰੀ ਹੁੰਦਾ ਹੈ। ਸਾਈਕਲ ਚਲਾਉਂਦੇ ਸਮੇਂ ਹੱਥ ਦੇ ਇਸ਼ਾਰੇ 3 ਸੈਕਿੰਡ ਰੂਲ ਦੇ ਨਾਲ ਵਰਤੇ ਜਾ ਸਕਦੇ ਹਨ।
