‘ਇਸ਼ਕ’ ਗੀਤ ਨਾਲ ਉੱਚਕੋਟੀ ਦੇ ਗੀਤਕਾਰਾਂ ਵਿੱਚ ਨਾਂ ਬਣਾ ਲਵੇਗਾ ਸ਼ਾਇਰ ਪੰਮਾ ਬੰਗੜ ਭੈਣੀ

 

ਅੱਜ ਇਨਾਂ ਸਤਰਾਂ ਰਾਂਹੀਂ ਅਸੀਂ ਗੱਲ ਕਰਨ ਜਾ ਰਹੇ ਹਾਂ ਘਰਦਿਆਂ ਦੇ ਪਰਮਲ ਕੁਮਾਰ ਤੇ ਸਾਹਿਤਕ ਹਲਕਿਆਂ ਦੇ ਗੀਤਕਾਰ, ਸ਼ਾਇਰ ਪੰਮੇ ਬੰਗੜ ਭੈਣੀ ਦੀ, ਜੋ ਸਾਹਿਤਕ ਖੇਤਰ ਵਿੱਚ ਆਪਣੇ ਨਾਂ ਦੀ ਗਹਿਰੀ ਮਾਣ-ਮੱਤੀ ਛਾਪ ਛੱਡਣ ਵਿਚ ਸਫ਼ਲ ਹੋ ਚੁੱਕਿਆ ਹੈ।  ਪਿਤਾ ਸ੍ਰੀ ਅਮਰ ਚੰਦ ਦੇ ਵਿਹੜੇ ਵਿਚ ਮਾਤਾ ਸ੍ਰੀਮਤੀ ਸਵਰਨੀ ਦੀ ਕੁੱਖ ਨੂੰ ਪਿੰਡ ਭੈਣੀ ਵਿਖੇ ਸੰਨ 1975 ਵਿੱਚ ਭਾਗ ਲਾਉਣ ਵਾਲੇ ਪੰਮੇ ਨੇ ਦੱਸਿਆ ਕਿ ਉਸ ਦੇ ਖਾਨਦਾਨ ਦੀ ਪਿਛੋਕੜ ਪਾਕਿਸਤਾਨ ਵਿਚ ਪਿੰਡ ਅੱਠ ਚੱਕ ਲਾਇਲਪੁਰ ਦੀ ਜਾਣੀ ਜਾਂਦੀ ਹੈ।  ਇੱਕ ਭੈਣ ਤੇ ਚਾਰ ਭਰਾਵਾਂ ਤੋਂ ਛੋਟਾ, ਬਚਪਨ ਤੇ ਜਵਾਨੀ ਗਰੀਬੀ ਵਿੱਚ ਲੰਘਾਉਣ ਵਾਲਾ, ਆਪਣੀ ਸਖਤ ਘਾਲਣਾ ਦੇ ਬਲਬੂਤੇ ਅਤੇ ਕੁਝ ਵਧੀਆ ਯਾਰਾਂ ਦੀ ਬਦੌਲਤ ਅੱਜ ਸਾਹਿਤ ਤੇ ਸਮਾਜ ਦਾ ਮੂੰਹ-ਮੁਹਾਂਦਰਾ ਸੰਵਾਰਨ ਵਿਚ ਆਪਣਾ ਸ਼ਲਾਘਾਯੋਗ ਯੋਗਦਾਨ ਪਾਉਣ ਵਿਚ ਤਨ, ਮਨ, ਧਨ ਤੋਂ ਜੁਟਿਆ ਹੋਇਆ ਆਪਣਾ ਪਰਿਵਾਰ ਵਧੀਆ ਪਾਲ ਰਿਹਾ ਹੈ। . ਜੇ ਗੱਲ ਕਰੀਏ ਉਸ ਦੇ ਲਿਖੇ ਗੀਤਾਂ ਦੀ, ਤਾਂ ਹੁਣ ਤੱਕ ਉਸਨੇ ਸਾਫ-ਸੁਥਰੇ, ਵਧੀਆ ਪਰਿਵਾਰਕ ਗੀਤ ਹੀ ਮਾਰਕਿਟ ਵਿੱਚ ਉਤਾਰੇ ਹਨ।  ਜਿਨਾਂ ਨੂੰ ਰਵਿੰਦਰ ਢੰਡ, ਕਸ਼ਮੀਰ ਕਮਲ, ਰੈਨੂ ਕਮਲ, ਨਿਸ਼ਾਨ ਉੱਚੇ ਵਾਲਾ, ਮਸਤ ਮੋਲਾ, ਜਾਕਿਰ ਹੁਸੈਨ ਆਦਿ ਅੱਡ-ਅੱਡ ਅਵਾਜ਼ਾਂ ਨੇ ਆਪਣੀਆਂ ਮਨਮੋਹਕ, ਦਿਲਕਸ਼, ਸੁਰੀਲੀਆਂ ਤੇ ਮਿੱਠੀਆਂ ਮਖਮਲੀ, ਲੱਛੇਦਾਰ ਅਵਾਜਾਂ ਦੀਆਂ ਛੋਹਾਂ ਦਿੰਦਿਆਂ ਰਿਕਾਰਡਿੰਗ ਦਾ ਜਾਮਾ ਪਹਿਨਾ ਕੇ ਜਿੱਥੇ ਖੁਦ ਨਾਮਨਾ ਖੱਟਿਆ ਹੈ, ਉਥੇ ਪੰਮਾ ਬੰਗੜ ਭੈਣੀ ਦੇ ਨਾਂ ਨੂੰ ਵੀ ਬੁਲੰਦੀਆਂ ਵੱਲ ਲਿਜਾਣ ਵਿਚ ਕੋਈ ਕਸਰ ਬਾਕੀ ਨਹੀਂ ਰਹਿਣ ਦਿੱਤੀ। 

          ਇਸ ਸਫ਼ਰ ਦੌਰਾਨ ਕਲਾ-ਪ੍ਰੇਮੀਆਂ ਵੱਲੋਂ ਦਿੱਤੀ ਹੱਲਾ-ਸ਼ੇਰੀ ਨੇ ਉਸ ਨੂੰ ਹੋਰ ਉਡਾਣਾ ਭਰਨ ਦਾ ਬਲ ਬਖਸ਼ਿਆ ਹੈ। ਜਿਸਦੇ ਨਤੀਜਨ ਉਹ ਆਪਣੇ ਕਈ ਨਵੇਂ ਗੀਤਾਂ ਨਾਲ ਕਲਾ-ਪ੍ਰੇਮੀਆਂ ਦੇ ਰੂ-ਬ-ਰੂ ਹੋਣ ਦੀ ਠਾਣੀ ਬੈਠਾ ਹੈ।  ਇਨਾਂ ਵਿਚੋਂ ਇੱਕ ਸੂਫੀਆਨਾ ਗੀਤ ‘ਇਸ਼ਕ’ ਥੋੜੇ ਹੀ ਦਿਨਾਂ ਤੱਕ ਲੈਕੇ ਉਹ ਹਾਜ਼ਰ ਹੋ ਰਿਹਾ ਹੈ। ਇਸ ਗੀਤ ਨੂੰ ਫੱਕਰਾਨਾ ਬਿਰਤੀ ਦੇ ਮਾਲਕ ਨਾਮਵਰ ਸੁਰੀਲੇ ਤੇ ਤਜ਼ਰਬੇਕਾਰ ਗਾਇਕ ਸੁਰਿੰਦਰ ਮਾਹੀਵਾਲ ਨੇ ਜਿਸ ਰੂਹ ਨਾਲ ਰਿਕਾਰਡ ਕਰਵਾਇਆ ਹੈ, ਉਸਤੋਂ ਕਲਾ ਦੇ ਜ਼ੌਹਰੀਆਂ ਨੂੰ ਆਸ ਹੀ ਨਹੀਂ, ਬਲਕਿ ਅਟੱਲ ਵਿਸ਼ਵਾਸ ਵੀ ਹੈ ਕਿ ਪੰਮੇ ਬੰਗੜ ਦਾ ਇਹ ‘ਇਸ਼ਕ’ ਗੀਤ ਉਸਨੂੰ ਉੱਚਕੋਟੀ ਦੇ ਗੀਤਕਾਰਾਂ ਦੀ ਕਤਾਰ ਵਿਚ ਸ਼ਾਨੋ-ਸ਼ੌਕਤ ਨਾਲ ਖੜਾ ਹੋਣ ਦਾ ਜਰੂਰ ਮਾਣ ਬਖ਼ਸ਼ੇਗਾ। ਇਸ ਤੋਂ ਇਲਾਵਾ ਹੋਰ ਵੀ ਕਈ ਸੁਰੀਲੇ ਗਾਇਕ ਸ਼ਾਇਰ ਪੰਮੇ ਬੰਗੜ ਦੇ ਗੀਤ ਰਿਕਾਰਡ ਕਰਵਾਉਣ ਲਈ ਕਮਰ ਕੱਸੀ ਬੈਠੇ ਹਨ।

          ਜਿਲਾ ਜਲੰਧਰ ਦੀ ਤਹਿਸੀਲ ਫਿਲੌਰ ਵਿਚ ਪੈਂਦੇ ਪਿੰਡ ਭੈਣੀ ਦੇ ਜੰਮਪਲ ਪੰਮੇ ਬੰਗੜ ਲਈ ਦੇਸ਼-ਵਿਦੇਸ਼ ਵਿਚ ਵਸਦੇ ਉਸਦੇ ਅਨਗਿਣਤ ਸਰੋਤਿਆਂ, ਦਰਸ਼ਕਾਂ, ਪ੍ਰਸ਼ੰਸਕਾਂ ਤੇ ਹਿਤੈਸ਼ੀਆਂ ਦੇ ਨਾਲ-ਨਾਲ ਸਾਡੀਆਂ ਵੀ ਦਿਲੀ ਦੁਆਵਾਂ ਤੇ ਸ਼ੁਭ ਕਾਮਨਾਵਾਂ ਹਨ ਕਿ ਆਉਣ ਵਾਲੀ ਸੱਜਰੀ ਸਵੇਰ ਇਸ ਮਿਹਨਤੀ, ਤਪੱਸਵੀ ਤੇ ਅਗਾਂਹ-ਵਧੂ ਸੋਚਣੀ ਦੇ ਮਾਲਕ ਸ਼ਾਇਰ ਪੰਮਾ ਬੰਗੜ ਭੈਣੀ ਦੇ ਨਾਂ ਹੋ ਗੁਜਰੇ।  ਉਸ ਦੇ ਸਜਾਏ ਹਰ ਸੁਪਨੇ ਪੂਰੇ ਹੋਣ ਤੇ ਉਹ ਸ਼ੁਹਰਤ ਦੀਆਂ ਹੋਰ ਵੀ ਬੁਲੰਦੀਆਂ ਦਾ ਹਾਣੀ ਬਣ ਜਾਵੇ। 

          ਪ੍ਰੀਤਮ ਲੁਧਿਆਣਵੀ (ਚੰਡੀਗੜ), 9876428641

ਸੰਪਰਕ : ਸ਼ਾਇਰ ਪੰਮਾ ਬੰਗੜ ਭੈਣੀ, 91 88725 96639