ਚੰਡੀਗੜ (ਪ੍ਰੀਤਮ ਲੁਧਿਆਣਵੀ), 1 ਮਈ, 2022: ਪੰਜਾਬ ਦੀ ਨਾਮਵਰ ਕੰਪਨੀ ਸਹਿਣਾ ਰਿਕਾਰਡਜ ਦੇ ਬੈਨਰ ਹੇਠ ਆਇਆ ਇੱਕ ਬਿੱਲਕੁਲ ਨਵਾਂ ਗੀਤ ‘ਉੱਡਿਆ ਤੇਰਾ ਜਹਾਜ’ ਪਾਕ-ਪਵਿੱਤਰ ਈਦ ਦੇ ਸ਼ੁਭ ਤਿਉਹਾਰ ਮੌਕੇ ਬਹਿਰੀਨ ਵਿੱਚ ਰੀਲੀਜ ਕੀਤਾ ਗਿਆ। ਵਿਦੇਸ਼ੀ ਧਰਤੀ ’ਤੇ ਵਸ ਰਹੇ ਉੱਘੇ ਗੀਤਕਾਰ ਰਜਨਾ ਰੌਲੀ ਵਾਲੇ ਵੱਲੋਂ ਕਲਮਬੱਧ ਕੀਤੇ ਗਏ ਇਸ ਗੀਤ ਨੂੰ ਮਿੱਠੀਆਂ, ਪਿਆਰੀਆਂ ਤੇ ਮਨਮੋਹਕ ਧੁੰਨਾਂ ਵਿੱਚ ਮਾਲਵੇ ਦੇ ਪ੍ਰਸਿੱਧ ਸੰਗੀਤ ਘਰ ਸਾਰੰਗ ਸਟੂਡੀਉ ਵੱਲੋਂ ਪ੍ਰੋਇਆ ਗਿਆ ਹੈ। ਇਸ ਦੀ ਵੀਡੀਓ ਲਵਲੀ ਗਿੱਲ ਨੇ ਅਤੇ ਪੋਸਟਰ ਡਿਜਾਇਨ ਪੰਜਾਬੀ ਕਮੇਡੀਅਨ ਹਾਸਰਸ ਅਤੇ ਸਿੰਗਰ ਗੁਰਪ੍ਰੀਤ ਸਹੋਤਾ ਬਨਾਵਾਲੀ ਨੇ ਪੂਰੀਆਂ ਰੀਝਾਂ ਤੇ ਪ੍ਰੀਤਾਂ ਨਾਲ ਤਿਆਰ ਕੀਤਾ ਹੈ।
ਪ੍ਰੈਸ ਨੂੰ ਜਾਣਕਾਰੀ ਦਿੰਦਿਆ ਗੀਤਕਾਰ ਰਾਜੂ ਨਾਹਰ ਨੇ ਦੱਸਿਆ ਕਿ ਪੰਜਾਬੀ ਗਾਇਕੀ ਦੇ ਥੰਮ ਤੇ ਪ੍ਰਸਿੱਧ ਗੀਤਕਾਰ ਭਿੰਦੇ ਸ਼ਾਹ ਰਾਜੋਆਣਾ ਦੇ ਆਸ਼ੀਰਵਾਦ ਸਦਕਾ ਮੇਰੇ ਭਰਾ ਬਲਵਿੰਦਰ ਸਿੰਘ ਖਾਈ ਨੇ ਰੱਬ ਵਰਗੇ ਸਰੋਤਿਆਂ ਦੀ ਕਚਹਿਰੀ ਵਿੱਚ ਪੇਸ਼ ਕੀਤਾ ਹੈ। ਬਹਿਰੀਨ ਵਿੱਚ ਰਹਿ ਰਹੇ ਮਨਜੀਤ ਸਿੰਘ, ਪਿੰਦਰ ਬਹਿਰੀਨ, ਗੁਰਪ੍ਰੀਤ ਸਿੰਘ, ਧਰਮਪਾਲ ਸਿੰਘ, ਪ੍ਰਗਟ ਸਿੰਘ ਗੋਪੀ ਬਹਿਰੀਨ, ਮਲਕੀਤ ਸਿੰਘ, ਸਨਦੀਪ ਬਠਿੰਡਾ ਤੇ ਰੁਪਿੰਦਰ ਬਹਿਰੀਨ ਆਦਿ ਮੇਰੇ ਪਰਮ ਮਿੱਤਰਾਂ ਵੱਲੋਂ ਪੂਰਾ ਪੂਰਾ ਸਾਥ ਮਿਲਿਆ ਹੈ। ਗਾਇਕਾ ਕੁਲਦੀਪ ਕੌਰ ਨੂੰ ਜਿਵੇਂ ਉਸਦੇ ਪਹਿਲਾਂ ਆਏ ਗੀਤਾਂ ਲਈ ਸਰੋਤਿਆਂ ਨੇ ਮੋਹ-ਪਿਆਰ ਤੇ ਰੱਜਵੀਂ ਅਪਣੱਤ ਬਖ਼ਸ਼ੀ ਹੈ ਉਸੇ ਤਰਾਂ ਇਸ ਨਵੇਂ ਗੀਤ ਤੋਂ ਵੀ ਸਾਨੂੰ ਪੂਰਨ ਆਸਾਂ-ਉਮੀਦਾਂ ਹਨ ਕਿ ਇਹ ਗੀਤ ਵੀ ਸਰੋਤਿਆਂ ਦੀ ਪਸੰਦ ਦੀ ਕਸੌਟੀ ਉਤੇ ਜਰੂਰ ਖ਼ਰਾ ਉਤਰੇਗਾ। ਉਹਨਾਂ ਅੱਗੇ ਦੱਸਿਆ ਕਿ ਇੱਕ ਸੱਜਰੀ ਵਿਆਹੀ ਮੁਟਿਆਰ ਆਪਣੇ ਮਾਹੀ ਨੂੰ ਜਦੋਂ ਜਹਾਜ਼ ਚੜਦਾ ਤੇ ਵਿਦਾ ਹੁੰਦਾ ਵੇਖਦੀ ਹੈ ਤਾਂ ਉਸਦਾ ਕੀ ਹਾਲ ਹੁੰਦਾ ਹੈ ਤੇ ਦਿਲ ’ਤੇ ਕੀ ਵਾਪਰਦੀ ਹੈ, ਇਸ ਗੀਤ ਵਿਚ ਸੁਣਨ ਤੇ ਵੇਖਣ ਨੂੰ ਮਿਲਦਾ ਹੈ।
No comments:
Post a Comment