ਚੰਡੀਗੜ੍ਵ (ਪ੍ਰੀਤਮ ਲੁਧਿਆਣਵੀ), 16 ਫਰਵਰੀ, 2022 : ਜਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ (ਨਵਾਂ ਸ਼ਹਿਰ) ਵਿਚ ਸਤਲੁਜ ਦਰਿਆ ਦੀ ਸਾਈਡ ’ਤੇ ਵਸਦੇ ਪਿੰਡ ਗੜ੍ਹੀ-ਉਧੋਵਾਲ ਵਿਖੇ ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਧੰਨ ਧੰਨ ਸਤਿਗੁਰ ਰਵੀਦਾਸ ਮਹਾਰਾਜ ਜੀ ਦਾ ਗੁਰਪੁਰਬ ਦਿਹਾੜਾ ਸਾਬਕਾ ਸਰਪੰਚ ਅਵਤਾਰ ਸਿੰਘ ਤਾਰੀ ਜੀ ਦੀ ਸੁਚੱਜੀ ਅਗਵਾਈ ਹੇਠ ਬੜੀ ਸ਼ਰਧਾ ਭਾਵਨਾ ਤੇ ਧੂਮ-ਧਾਮ ਨਾਲ ਮਨਾਇਆ ਗਿਆ। ਪਿਛਲੇ 10-11 ਦਿਨਾਂ ਤੋਂ ਪਿੰਡ ਵਾਸੀਆਂ ਵੱਲੋਂ ਪ੍ਰਭਾਤ ਫੇਰੀਆਂ ਕੱਢੀਆਂ ਜਾਂਦੀਆਂ ਰਹੀਆਂ। ਅਖੀਰਲੇ ਦਿਨ ਪਿੰਡ ਦੇ ਗੁਰਦੁਆਰਾ ਸਾਹਿਬ ਤੋਂ ਲੈਕੇ ਪਿੰਡ ਕਾਲੇਵਾਲ ਤੱਕ ਬੜੀ ਸ਼ਾਨੋ-ਸ਼ੌਕਤ ਨਾਲ ਨਗਰ ਕੀਰਤਨ ਕੱਢਿਆ ਗਿਆ।
 |
ਪ੍ਰੈਸ ਨੂੰ ਜਾਣਕਾਰੀ ਦਿੰਦਿਆਂ ਅਵਤਾਰ ਤਾਰੀ ਸਾਬਕਾ ਸਰਪੰਚ ਅਤੇ ਸ਼ਰਧਾਲੂ ਬਲਬੀਰ ਸਿੰਘ ਸੱਲ੍ਹਣ ਨੇ ਦੱਸਿਆ ਕਿ ਪਿੰਡ ਅਤੇ ਇਲਾਕੇ ਭਰ ਦੀਆਂ ਸੰਗਤਾਂ ਵਿਚ ਧੰਨ ਧੰਨ ਗੁਰੂ ਰਵੀਦਾਸ ਜੀ ਦਾ ਗੁਰਪਰਬ ਮਨਾਉਣ ਲਈ ਬੇਹੱਦ ਸ਼ਰਧਾ ਭਾਵਨਾ ਪਾਈ ਜਾ ਰਹੀ ਹੈ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਗੁਰਦੁਆਰਾ ਸਾਹਿਬ ਦੇ ਪਾਠੀ ਲਖਵਿੰਦਰ ਸਿੰਘ ਲੱਖਾ ਦੇ ਨਾਲ-ਨਾਲ ਤਰਸੇਮ ਸਿੰਘ ਫੌਜੀ, ਬਲਬੀਰ ਸਿੰਘ ਬਿੱਲਾ, ਮਹਿੰਦਰ ਪਾਲ ਘੁੱਲਾ, ਹਰਬੰਸ ਲਾਲ, ਮਹਿੰਦਰ ਪਾਲ ਵਿੱਕੀ, ਪਰਦੀਪ ਕੁਮਾਰ ਸੱਲ੍ਹਣ (ਅਜੇ), ਰਣਜੀਤ ਭਟੋਆ (ਢੋਲੀ), ਕੈਸ਼ੀਅਰ ਰਾਮ ਲਭਾਇਆ ਤੇ ਸੰਜੀਵ (ਸ਼ੀਪਾ) ਆਦਿ ਸੇਵਾਦਾਰ ਸ਼ਰਧਾਲੂ ਤਨ, ਮਨ, ਧਨ ਨਾਲ ਪੂਰੀ ਤਰ੍ਹਾਂ ਸਰਗਰਮ ਰਹੇ। ਬਲਬੀਰ ਸੱਲ੍ਹਣ ਤੇ ਅਵਤਾਰ ਤਾਰੀ ਨੇ ਅੱਗੇ ਦੱਸਿਆ ਕਿ ਪ੍ਰਭਾਤ-ਫੇਰੀਆਂ ਅਤੇ ਨਗਰ-ਕੀਰਤਨ ਦੀਆਂ ਸਰਗਰਮੀਆਂ ਵਿਚ ਸ਼ਬਦ ਗਾਇਨ ਕਰ ਕੇ ਰੌਣਕਾਂ ਲਾਉਣ ਵਾਲਿਆਂ ਵਿਚ ਗਾਇਕ ਪਰਦੀਪ ਕੁਮਾਰ ਸੱਲ੍ਹਣ (ਅਜੇ) ਤੇ ਰਣਜੀਤ ਭਟੋਆ (ਢੋਲੀ) ਦੀ ਭੂਮਿਕਾ ਵਿਸ਼ੇਸ਼ ਸਲਾਹੁਣ ਯੋਗ ਰਹੀ, ਜਿਸ ਨੂੰ ਸੰਗਤਾਂ ਨੇ ਖੂਬ ਪਸੰਦ ਕੀਤਾ। ਕੁੱਲ ਮਿਲਾ ਕੇ ਪਿੰਡ ਗੜ੍ਹੀ-ਉਧੋਵਾਲ ਵਾਸੀਆਂ ਦੀਆਂ ਧਾਰਮਿਕ, ਸਮਾਜਿਕ ਤੇ ਭਾਈਚਾਰਕ ਸਾਂਝਾਂ ਨੂੰ ਮਜਬੂਤ ਕਰਦਾ ਧੰਨ ਧੰਨ ਸਤਿਗੁਰ ਰਵੀਦਾਸ ਮਹਾਰਾਜ ਜੀ ਦਾ ਮਨਾਇਆ ਗੁਰਪੁਰਬ ਦਿਹਾੜਾ ਯਾਦਗਾਰੀ ਦਿਹਾੜਾ ਹੋ ਨਿੱਬੜਿਆ, ਜਿਸ ਦੀ ਇਲਾਕੇ ਵਿਚ ਖੂਬ ਚਰਚਾ ਹੈ।
No comments:
Post a Comment