ਆਪਣੀਆਂ ਮੰਗਾਂ ਨੂੰ ਲੈ ਕੇ ਸਘੰਰਸ਼ ਕਰ ਰਹੇ ਮਗਨਰੇਗਾ ਮੁਲਾਜਮਾਂ ਦਾ ਸਾਥ ਦੇਣਗੇ ਸਰਪੰਚ ਯੂਨੀਅਨ ਦੇ ਸਮੂਹ ਮੈਂਬਰ- ਸਰਪੰਚ ਕੁਲਵਿੰਦਰ ਬਾਘਾ

 

9 ਜੁਲਾਈ ਤੋਂ ਪੰਜਾਬ ਭਰ ਵਿੱਚ ਮਗਨਰੇਗਾ ਯੂਨੀਅਨ ਦੇ ਮੁਲਾਜਮ ਕਰ ਰਹੇ ਹਨ ਲਗਾਤਾਰ ਹੜਤਾਲ - ਜਰਨਲ ਸਕੱਤਰ ਅਮਨ ਸ਼ੂਰ 

ਜਲੰਧਰ (ਖ਼ਬਰਸਾਰ ਪੰਜਾਬ ਬਿਓੁਰੋ)- ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਅਧੀਨ ਕੰਟਰੈਕਟ ਤੇ ਡਿਊਟੀ ਕਰ ਰਹੇ ਮਗਨਰੇਗਾ ਮੁਲਾਜਮਾਂ ਦਾ ਮਸਲਾ ਵਿਭਾਗ ਦੇ ਉੱਚ ਅਧਿਕਾਰੀਆਂ ਦੀ ਬੇਰੁੱਖੀ ਕਾਰਨ ਹੱਲ ਹੁੰਦਾ ਨਜਰ ਨਹੀਂ ਆ ਰਿਹਾ। ਪ੍ਰੈੱਸ ਨੂੰ ਬਿਆਨ ਜਾਰੀ ਕਰਦਿਆਂ ਯੂਨੀਅਨ ਜਲੰਧਰ ਦੇ ਜਰਨਲ ਸਕੱਤਰ ਅਮਨ ਸ਼ੂਰ ਬਲਾਕ ਜਲੰਧਰ ਪੂਰਬੀ ਨੇ ਦੱਸਿਆ ਕਿ 9 ਜੁਲਾਈ ਤੋਂ ਪੰਜਾਬ ਭਰ ਦੇ ਮੁਲਾਜ਼ਮ ਲਗਾਤਾਰ ਹੜਤਾਲ ਤੇ ਚੱਲ ਰਹੇ ਹਨ ਅਤੇ ਉਨ੍ਹਾਂ ਦੀਆਂ ਮੰਗਾਂ ਦਾ ਕੋਈ ਵੀ ਹੱਲ ਸਰਕਾਰ ਵਲੋਂ ਨਹੀਂ ਕੀਤਾ ਜਾ ਰਿਹਾ। ਜਿਸਨੂੰ ਦੇਖਦੇ ਹੋਏ ਨਰੇਗਾ ਕਰਮਚਾਰੀ ਯੂਨੀਅਨ ਪੰਜਾਬ ਵੱਲੋਂ 12 ਅਗਸਤ ਤੋਂ ਮੋਹਾਲੀ ਵਿਕਾਸ ਭਵਨ ਵਿਖੇ ਸਘੰਰਸ਼ ਕਰਦੇ ਹੋਏ ਪੱਕਾ ਮੋਰਚਾ ਲਾਇਆ ਹੋਇਆ ਹੈ। ਵਿਭਾਗ ਦੀ ਵਿੱਤੀ ਸਕੱਤਰ ਸੀਮਾ ਜੈਨ ਵੱਲੋਂ 3 ਅਗਸਤ 2021 ਨੂੰ ਯੂਨੀਅਨ ਨਾਲ ਮੀਟਿੰਗ ਕਰਕੇ ਕੰਟਨਜੰਸੀ ਦੇ ਪੈਸੇ ਵਿੱਚੋਂ ਹੀ ਸਕੇਲ ਦੇਣ ਤੇ ਸਮਝੌਤਾ ਕੀਤਾ ਗਿਆ ਸੀ। ਪਰ ਵਿਭਾਗ ਦੇ ਉੱਚ ਅਧਿਕਾਰੀ ਇਸ ਸਮਝੌਤੇ ਤੋਂ ਪਿਛੇ ਭੱਜੇ ਹਨ। ਉਨ੍ਹਾਂ ਕਿਹਾ ਪਿੰਡਾਂ ਵਿੱਚ ਨਰੇਗਾ ਮਜਦੂਰਾਂ ਦਾ ਨੁਕਸਾਨ ਹੋ ਰਿਹਾ ਹੈ ਅਤੇ ਪਿੰਡਾਂ ਵਿੱਚ ਵਿਕਾਸ ਕਾਰਜ ਠੱਪ ਪਏ ਹਨ। ਪੰਚਾਇਤਾਂ ਵੱਲੋਂ ਉਧਾਰ ਚੁੱਕਿਆ ਮਟੀਰੀਅਲ ਬਰਬਾਦ ਹੋ ਰਿਹਾ ਹੈ। ਮਗਨਰੇਗਾ ਮੁਲਾਜਮਾਂ ਦੀਆਂ ਕਈ ਮਹੀਨਿਆਂ ਦੀ ਤਨਖਾਹਾਂ ਵੀ ਵਿਭਾਗ ਨਹੀਂ ਦੇ ਰਿਹਾ। ਪੰਚਾਇਤ ਸਕੱਤਰਾਂ ਅਤੇ ਹੋਰ ਅਮਲੇ ਦੀ ਹੜਤਾਲ ਕਾਰਨ ਸਥਿਤੀ ਹੋਰ ਵੀ ਮਾੜੀ ਹੋ ਗਈ ਹੈ। ਆਮ ਲੋਕਾਂ ਦੀ ਖੱਜਲ ਖੁਆਰੀ ਲਈ ਵਿਭਾਗ ਦੇ ਉੱਚ ਅਧਿਕਾਰੀ ਜਿੰਮੇਵਾਰ ਹਨ। ਉਨ੍ਹਾਂ ਕਿਹਾ ਸੀਨੀਅਰ ਅਧਿਕਾਰੀਆਂ ਵੱਲੋਂ ਮੁਲਾਜਮਾਂ ਨੂੰ ਨੌਕਰੀ ਤੋਂ ਕੱਢ ਦੇਣ ਦੀਆਂ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ ਅਤੇ ਤਨਖਾਹਾਂ ਬੰਦ ਕਰ ਦਿੱਤੀਆਂ ਹਨ। ਉਨ੍ਹਾਂ ਦਸਿਆ 20 ਅਗਸਤ 2021 ਨੂੰ ਪੰਜਾਬ ਸਰਕਾਰ ਵਲੋਂ ਪੱਤਰ ਜਾਰੀ ਕਰਦੇ ਹੋਏ ਕਰਮਚਾਰੀਆਂ ਨੂੰ ਹਦਾਇਤ ਜਾਰੀ ਕੀਤੀ ਹੈ ਕਿ 48 ਘੰਟਿਆਂ ਦੇ ਅੰਦਰ ਆਪਣੀ ਡਿਊਟੀ ਜੁਆਇੰਨ ਕੀਤੀ ਜਾਵੇ। ਇਸ ਮਸਲੇ ਸਬੰਧੀ ਮਗਨਰੇਗਾ ਕਰਮਚਾਰੀ ਯੂਨੀਅਨ ਨੇ ਪੰਜਾਬ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਉਨ੍ਹਾਂ ਵਲੋਂ ਦਿਤੇ ਗਏ ਮੰਗ ਪੱਤਰ ਵਿੱਚ ਕੀਤੀ ਗਈ ਅਪੀਲ ਨੂੰ ਪ੍ਰਵਾਨ ਕੀਤਾ ਜਾਵੇ, ਨਹੀਂ ਤਾਂ ਚੱਲ ਰਹੇ ਸੰਘਰਸ਼ ਨੂੰ ਹੋਰ ਵੀ ਤੇਜ਼ ਕੀਤਾ ਜਾਵੇਗਾ। ਜਰਨਲ ਸਕੱਤਰ ਅਮਨ ਸ਼ੂਰ ਨੇ ਦਸਿਆ ਕਿ ਉਨ੍ਹਾਂ ਸਘੰਰਸ਼ ਵਿੱਚ ਸਾਥ ਦੇਣ ਲਈ ਸਰਪੰਚ ਯੂਨੀਅਨ, ਪਿੰਡਾਂ ਦੀ ਲੇਬਰ ਯੂਨੀਅਨ ਅਤੇ ਪੰਚਾਇਤਾਂ ਦੇ ਸਰਪੰਚਾਂ ਨੇ ਵੀ ਸਹਿਮਤੀ ਪ੍ਰਗਟਾਈ ਹੈ ਅਤੇ ਸਘੰਰਸ਼ ਵਿੱਚ ਸਾਥ ਦੇਣ ਦਾ ਐਲਾਨ ਕੀਤਾ ਹੈ। ਉਨ੍ਹਾਂ ਕਿਹਾ ਇਨ੍ਹਾਂ ਸਾਰਿਆਂ ਨੂੰ ਨਾਲ ਲੈ ਕੇ ਸਘੰਰਸ਼ ਨੂੰ ਹਰ ਵੱਡਾ ਰੂਪ ਦੇ ਕੇ ਆਪਣੀਆਂ ਮੰਗਾਂ ਦੀ ਅਵਾਜ਼ ਨੂੰ ਬੁਲੰਦ ਕੀਤਾ ਜਾਵੇਗਾ। ਇਸ ਮੀਟਿੰਗ ਦੋਰਾਨ ਸਰਪੰਚ ਯੂਨੀਅਨ ਦੇ ਪ੍ਰਧਾਨ ਸ਼੍ਰੀ ਕੁਲਵਿੰਦਰ ਬਾਘਾ, ਸ਼੍ਰੀ ਰਣਬੀਰ ਸਿੰਘ ਸੀ.ਏ, ਸੁਮੀਤ ਮੋਹਨ ਸੀ.ਏ, ਸ਼੍ਰੀ ਹਰਦੀਪ ਸਿੰਘ ਬਲਾਕ ਜਲੰਧਰ ਪੂਰਬੀ ਪ੍ਰਧਾਨ, ਬਲਾਕ ਭੋਗਪੁਰ ਪ੍ਰਧਾਨ ਪਰਦੀਪ ਸਿੰਘ, ਪਰਦੀਪ ਸਿੰਘ (ਜੰਡੀਰ), ਮੈਡਮ ਕਿਰਨਜੀਤ ਕੌਰ, ਪੂਜਾ, ਰਿੰਪੀ ਕਜਲਾ, ਰਾਜਪਾਲ, ਰਵਿੰਦਰਜੀਤ ਸਿੰਘ, ਜੀ.ਆਰ.ਐਸ ਅਤੇ ਹੋਰ ਮਗਨਰੇਗਾ ਕਰਮਚਾਰੀ ਹਾਜ਼ਰ ਸਨ।