ਪ੍ਰਸਿੱਧ ਕਵਿੱਤਰੀ, ਐਂਕਰ ਤੇ ਕਹਾਣੀਕਾਰਾ : ਅਮਰਦੀਪ ਕੌਰ ਲੱਕੀ

 

         

ਸਾਹਿਤਕ, ਸੱਭਿਆਚਾਰਕ ਅਤੇ ਵਿੱਦਿਅਕ ਖੇਤਰ ਵਿਚ ਸਮਾਜ ਲਈ ਕੁਝ ਕਰ ਗੁਜ਼ਰਨ ਦਾ ਮਾਦਾ ਰੱਖਣ ਵਾਲੀ ਨੌ-ਜਵਾਨ ਪੀੜੀ ਵਿਚੋਂ ਅਮਰਦੀਪ ਕੌਰ ਲੱਕੀ ਇਕ ਸਿਰਮੌਰ ਨਾਂਓਂ ਹੈ। ‘ਖੋਲੋ ਦਿਮਾਗ ਦੇ ਦੁਆਰ’, ‘ਆ ਬਾਬਾ ਨਾਨਕਾ’, ‘ਛੱਡ ਦੇ ਸ਼ਰਾਬ ਸਰਦਾਰਾ’, ‘ਨਾਰੀ ਦਿਵਸ ’ਤੇ’ ਅਤੇ ‘ਮਾਂ’ ਆਦਿ ਕਵਿਤਾਵਾਂ ਅਤੇ, ‘ਸ਼ੁਰੂਆਤ’, ‘ਅਸਲੀ ਸਜ਼ਾ’, ‘ਕਬੂਤਰ ਤੇ ਸ਼ਿਕਾਰੀ’ ਅਤੇ ‘ਨਮਕ ਹਰਾਮੀ’ ਆਦਿ ਉਸਦੀ ਕਲਮ ਦੀਆਂ ਸਿਰਜੀਆਂ ਅਤੇ ਦੇਸ਼-ਵਿਦੇਸ਼ ਦੇ ਅਖ਼ਬਾਰਾਂ-ਮੈਗਜ਼ੀਨਾਂ ਦਾ ਸ਼ਿੰਗਾਰ ਬਣੀਆਂ ਉਸ ਦੀਆਂ ਅਨੇਕਾਂ ਕਹਾਣੀਆਂ ਦੱਸਦੀਆਂ ਹਨ ਕਿ ਅਮਰਦੀਪ ਵਾਕਿਆ ਹੀ ‘ਲੱਕੀ’ ਹੈ, ਜਿਸਨੂੰ ਕਿ ਵਾਰਤਿਕ ਅਤੇ ਕਾਵਿ ਦੋਵਾਂ ਰੂਪਾਂ ਵਿਚ ਸਿਰੇ ਦੀ ਮੁਹਾਰਤ ਹਾਸਲ ਹੈ। ਆਪਣੀਆਂ ਲਿਖੀਆਂ ਕਵਿਤਾਵਾਂ-ਗੀਤਾਂ ਨੂੰ ਜਦੋਂ ਉਹ ਸਟੇਜਾਂ ਉਤੇ ਗਾਉਂਦੀ ਹੈ ਤਾਂ ਅਗਲੀ ਕਲਾ ਉਸ ਦੀ ਸਾਹਮਣੇ ਆ ਜਾਂਦੀ ਹੈ, ਸੁਰੀਲੇ ਗਲੇ ਵਾਲੀ ਗਾਇਕੀ ਦੀ। . . ਫਿਰ 20 ਅਕਤੂਬਰ 2015 ਨੂੰ ਪੰਜਾਬੀ ਸੂਬੇ ਦੀ 50-ਵੀਂ ਵਰੇ-ਗੰਢ ਮਨਾਉਣ ਮੌਕੇ, ਜਦੋਂ ਕਿ ਸੁਖਬੀਰ ਸਿੰਘ ਬਾਦਲ ਜੀ ਮੁੱਖ ਮਹਿਮਾਨ ਵਜੋਂ ਉਸ ਦੇ ਸਕੂਲ ਵਿਚ ਪਧਾਰੇ ਸਨ, ਤਾਂ ਐਂਕਰ ਦੀ ਡਿਊਟੀ ਅਮਰਦੀਪ ਕੌਰ ਨੇ ਬਾ-ਖ਼ੂਬੀ ਨਿਭਾ ਕੇ ਸਾਬਤ ਕਰ ਵਿਖਾਇਆ ਸੀ ਕਿ ਉਹ ਇਕ ਸਫ਼ਲ ਐਂਕਰ ਵੀ ਹੈ। 

           ਦਕੋਹਾ (ਜਲੰਧਰ) ਦੀ ਜੰਮਪਲ, ਪਿਤਾ ਸ. ਹਿੰਮਤ ਸਿੰਘ ਜੀ ਅਤੇ ਮਾਤਾ ਸ੍ਰੀਮਤੀ ਹਰਮਿੰਦਰ ਕੌਰ ਜੀ ਦੀ ਲਾਡਲੀ ਅਮਰਦੀਪ ਦੱਸਦੀ ਹੈ ਕਿ ਉਸਦੇ ਲਿਖਣ ਦਾ ਸਫ਼ਰ ਗੌਰਮਿੰਟ ਪੌਲੀਟੈਕਨਿਕ ਜਲੰਧਰ ਵਿਖੇ ਆਫ਼ਿਸ ਮੈਨੇਜਮੈਂਟ ਦਾ ਡਿਪਲੋਮਾ ਕਰਦਿਆਂ ਉੱਥੋਂ ਦੇ ਇੱਕ ਲੋਕਲ ਮੈਗ਼ਜ਼ੀਨ ਤੋਂ ਸ਼ੁਰੂ ਹੋਇਆ ਸੀ। ਐੱਮ. ਏ. ਬੀ. ਐੱਡ ਦੇ ਨਾਲ-ਨਾਲ ਆਫ਼ਿਸ ਮੈਨੇਜਮੈਂਟ ਦਾ ਡਿਪਲੋਮਾ ਪਾਸ ਇਹ ਮੁਟਿਆਰ ਅੱਜ-ਕੱਲ ਬਾਲ ਭਾਰਤੀ ਪਬਲਿਕ ਸਕੂਲ (ਸੀ. ਬੀ. ਐੱਸ. ਈ.) ਵਿੱਚ ਬਤੌਰ ਪੰਜਾਬੀ ਅਧਿਆਪਕਾ (ਐਚ. ਓ. ਡੀ. ਪੰਜਾਬੀ ਡੀਪਾਰਟਮੈਂਟ) ਭੂਮਿਕਾ ਨਿਭਾਅ ਰਹੀ ਹੈ। ਉਹ ਸਕੂਲ ਵਿਚ ਵਿਦਿਆਰਥੀਆਂ ਨੂੰ ਸਮੇਂ-ਸਮੇਂ ਤੇ ਕਵਿਤਾ, ਭਾਸ਼ਣ, ਮਾਈਮ ਤੇ ਸਕਿੱਟ ਆਦਿ ਮੁਕਾਬਲਿਆਂ ਦੀ ਵੀ ਤਿਆਰੀ ਕਰਵਾਉਂਦੀ ਹੈ। ਪ੍ਰਕਾਸ਼ਨਾ ਖੇਤਰ ਵਿਚ ਲੱਕੀ ਦੀਆਂ ਰਚਨਾਵਾਂ ਹਾਇਕੂ ਵਿਸ਼ੇ ਤੇ ਦੋ ਸਾਂਝੀਆਂ ਕਿਤਾਬਾਂ ‘ਸੰਦਲੀ ਪੈੜਾਂ’ ਤੇ ‘ਪੰਜਾਬੀ ਹਾਇਕੂ ਰਿਸ਼ਮਾਂ’, ਤਾਂਕਾ ਵਿਸ਼ੇ ਤੇ ‘ਇੱਕੋ ਰਾਹ ਦੇ ਪਾਂਧੀ’ ਵਿਚ ਛਪ ਚੁੱਕੀਆਂ ਹਨ। ਇਸੇ ਤਰਾਂ, ‘ਮਹਿਕ ਪੰਜਾਬ ਦੀ’ ‘ਕਿੰਨਰਾਂ ਵੀ ਦਿਲ ਹੁੰਦਾ’ (ਸਾਂਝਾ ਕਹਾਣੀ ਸੰਗ੍ਰਹਿ),‘ਰੱਬ ਦੇ ਬੰਦੇ’, ‘ਇਸ਼ਕ ਮਜਾਜੀ ਤੋਂ ਇਸ਼ਕ ਹਕੀਕੀ ਤੱਕ’ ਅਤੇ ‘ਰੰਗ-ਬਰੰਗੀਆਂ ਕਲਮਾਂ’ ਦਾ ਵੀ ਸ਼ਿੰਗਾਰ ਬਣੀਆਂ ਹਨ, ਉਸ ਦੀਆਂ ਕਵਿਤਾਵਾਂ। ਇਸ ਤੋਂ ਇਲਾਵਾ ਇੱਕ ਸੇਦੋਕਾ ਵਿਸ਼ੇ ਤੇ ਸਾਂਝੀ ਪੁਸਤਕ ਵਿਚ ਵੀ ਉਹ ਸ਼ਾਮਲ ਹੈ।

          ਅਨੇਕਾਂ ਸਟੇਜਾਂ ਤੋਂ ਮਾਨ-ਸਨਮਾਨ ਹਾਸਲ ਕਰ ਚੁੱਕੀ ਲੱਕੀ ਦੀ ਇੱਥੇ ਹੀ ਬਸ ਨਹੀ, ਜਿੱਥੇ ਉਹ ‘ਸਾਂਝੀ ਅਵਾਜ਼ ਆਸਟ੍ਰੇਲੀਆ’ ਅਤੇ ਪੰਜਾਬੀ ਸੱਥ ਮੈਲਬੌਰਨ ਤੋਂ ਪੇਸ਼ਕਾਰੀ ਦੇ ਚੁੱਕੀ ਹੈ, ਉਥੇ ਲੌਕ-ਡਾਊਨ ਦੌਰਾਨ ਵੀ ਉਹ ਨਿੱਤ ਕਿਸੇ-ਨਾ-ਕਿਸੇ ਆਨਲਾਈਨ ਕਵੀ-ਦਰਬਾਰ ਵਿਚ ਅਕਸਰ ਮਿਲ ਹੀ ਪੈਂਦੀ ਰਹੀ ਹੈ, ਆਪਣੀਆਂ ਰਚਨਾਵਾਂ ਨਾਲ ਰੰਗ ਬੰਨਦੀ।  ਰੱਬ ਕਰੇ ! ਸਾਹਿਤ ਤੇ ਸਮਾਜ ਲਈ ਬੜੇ ਉਚੇ-ਉਚੇ ਸੁਪਨੇ ਸਮੋਈ ਬੈਠੀ, ਇਸ ਖੂਬਸੂਰਤ ਮੁਟਿਆਰ ਦੇ ਸਭੇ ਸੁਪਨੇ ਸਾਕਾਰ ਹੋ ਕੇ ਉਸ ਨੂੰ ਉਚੇਰੀਆਂ ਮੰਜ਼ਲਾਂ ਦੇ ਹਾਣੀ ਬਣਾਉਣ ! ਆਮੀਨ !

          -ਪ੍ਰੀਤਮ ਲੁਧਿਆਣਵੀ, (ਚੰਡੀਗੜ), 9876428641