ਤਿਉਹਾਰ ਮੌਕੇ ਮੁਟਿਆਰਾਂ ਨੇ ਪਾਇਆ ਗਿੱਧਾ ਤੇ ਝੂਟੀਆਂ ਪੀਂਘਾਂ
ਆਯੋਜਿਤ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜ਼ੋਂ ਸਰਬਜੀਤ ਕੌਰ ਧਾਲੀਵਾਲ ਪੁੱਜੇ
ਫਗਵਾੜਾ 31 ਜੁਲਾਈ (ਹਰੀਸ਼ ਭੰਡਾਰੀ)-ਪਿੰਡ ਹਰਦਾਸਪੁਰ ਵਿਖੇ ਉਸ ਸਮੇਂ ਮਾਹੌਲ ਖੁਸ਼ੀਆਂ ਭਰਿਆ ਹੋ ਗਿਆ ਜਦੋਂ ਪਿੰਡ ਦੇ ਸਰਕਾਰੀ ਪ੍ਰਾਇਮਰੀ ਸਮਾਰਟ ਸਕੂਲ ਵਿਖੇ ਤੀਜ ਦੇ ਮਹੀਨੇ ਮੁਟਿਆਰਾਂ ਦਾ ਪਸੰਦੀਦਾ ਰਵਾਇਤੀ ਤਿਓਹਾਰ ਤੀਆਂ ਦਾ ਤਿਓਹਾਰ ਮਨਾਇਆ ਗਿਆ। ਇਸ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਹਲਕਾ ਵਿਧਾਇਕ ਸ੍ਰ ਬਲਵਿੰਦਰ ਸਿੰਘ ਧਾਲੀਵਾਲ ਦੇ ਧਰਮਪਤਨੀ ਸਰਬਜੀਤ ਕੌਰ ਧਾਲੀਵਾਲ ਪੁੱਜੇ ਅਤੇ ਆਯੋਜਿਤ ਕੀਤੇ ਗਏ ਸਮਾਗਮ ਦਾ ਆਰੰਭ ਕੀਤਾ ਗਿਆ। ਇਸ ਮੌਕੇ ਉਨ੍ਹਾਂ ਪਿੰਡ ਦੀਆਂ ਮੁਟਿਆਰਾਂ ਨਾਲ ਮਿਲ ਕੇ ਤੀਆਂ ਦੇ ਤਿਓਹਾਰ ਦਾ ਆਨੰਦ ਮਾਣਦੇ ਹੋਏ ਗਿੱਧਾ ਤੇ ਬੋਲੀਆਂ ਵੀ ਪਾਈਆਂ ਤੇ ਕਿਹਾ ਕੇ ਅਜਿਹੇ ਤਿਓਹਾਰ ਪੰਜਾਬ ਦੀ ਸ਼ਾਨ ਹਨ ਤੇ ਆਪਸੀ ਭਾਈਚਾਰੇ ਦਾ ਪ੍ਰਤੀਕ ਹਨ ਤੇ ਰਿਸ਼ਤਿਆਂ ਵਿੱਚ ਮਧੁਰਤਾ ਲਿਆਉਂਦੇ ਹਨ। ਇਸ ਮੌਕੇ ਸਰਜੀਵਨ ਲਤਾ ਜਿਲਾ ਪ੍ਰਧਾਨ ਮਹਿਲਾ ਕਾਂਗਰਸ, ਮੀਨਾਕਸ਼ੀ ਵਰਮਾ, ਸੀਤਾ ਦੇਵੀ, ਨਿਸ਼ਾ ਰਾਣੀ ਖੇੜਾ ਜਿਲਾ ਪ੍ਰੀਸ਼ਦ ਮੈਂਬਰ ਅਤੇ ਹੋਰ ਆਜੀਮ ਸਖਸ਼ੀਅਤਾਂ ਵੀ ਪੁੱਜੀਆਂ ਤੇ ਤਿਓਹਾਰ ਦਾ ਆਨੰਦ ਮਾਣਿਆ। ਇਸ ਤਿਓਹਾਰ ਨੂੰ ਲੈ ਕੇ ਪਿੰਡ ਹਰਦਾਸਪੁਰ ਵਿਖੇ ਕਰਵਾਏ ਗਏ ਇਸ ਸਮਾਰੋਹ ਵਿੱਚ ਪਿੰਡ ਦੇ ਹੀ ਉੱਘੇ ਸਮਾਜ ਸੇਵੀ ਹਰਨੇਕ ਸਿੰਘ ਨੇਕਾ ਦੀਆਂ ਸੇਵਾਵਾਂ ਸ਼ਲਾਘਾਯੋਗ ਰਹੀਆਂ ਜਿਨਾਂ ਨੇ ਆਪਣੇ ਨਿੱਜੀ ਖਰਚੇ ਤੇ ਪਿੰਡ ਦੀਆਂ ਧੀਆਂ-ਭੈਣਾਂ ਦੀ ਖੁਸ਼ੀ ਲਈ ਸਕੂਲ ਵਿਖੇ ਇਸ ਸਮਾਰੋਹ ਦਾ ਆਯੋਜਨ ਕੀਤਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸਕੂਲ ਦੇ ਹੈੱਡ ਟੀਚਰ ਮੈਡਮ ਗੁਰਵਿੰਦਰ ਕੌਰ ਤੇ ਸਮੂਹ ਸਕੂਲ ਸਟਾਫ ਮੈਂਬਰ, ਦੀਪ ਸਿੰਘ ਹਰਦਾਸਪੁਰ, ਪੰਚਾਇਤ ਮੈਂਬਰ ਰਾਣੋ, ਗਿਆਨ ਚੰਦ, ਸ਼ੌਂਕੀ ਪਾਰਸ ਹਰਦਾਸਪੁਰ ਤੇ ਇਲਾਕੇ ਦੀਆਂ ਹੋਰ ਉੱਘੀਆਂ ਸਖਸ਼ੀਅਤਾਂ ਮੌਜੂਦ ਰਹੀਆਂ। ਆਯੋਜਿਤ ਕੀਤੇ ਗਏ ਇਸ ਸੱਭਿਅਕ ਸਮਾਗਮ ਦੀ ਵਿਸ਼ੇਸ਼ਤਾ ਤੇ ਖਾਸ ਆਕਰਸ਼ਣ ਇਹ ਰਿਹਾ ਕੇ ਇਸ ਸਮਾਰੋਹ ਵਿੱਚ ਪਿੰਡ ਦੀਆਂ ਮੁਟਿਆਰਾਂ ਦੇ ਨਾਲ- ਨਾਲ, ਪਿੰਡ ਹਰਦਾਸਪੁਰ ਦੀਆਂ ਮਾਤਾਵਾਂ, ਭੈਣਾਂ ਤੇ ਬਜੁਰਗ ਔਰਤਾਂ ਨੇ ਵੀ ਸ਼ਾਮਿਲ ਹੋ ਕੇ ਤਿਓਹਾਰ ਦਾ ਆਨੰਦ ਮਾਣਿਆ ਜਦਕਿ ਇਸ ਸਮਾਰੋਹ ਵਿੱਚ ਨੰਨੇ-ਮੁੰਨੇ ਬੱਚੇ ਵੀ ਵੱਡੀ ਗਿਣਤੀ ਵਿੱਚ ਝੂਮਦੇ ਨਜਰ ਆਏ ਤੇ ਇਸ ਮੌਕੇ ਚਰਖਾ, ਪੱਖੀਆਂ, ਪੀਂਘਾਂ ਤੇ ਹੋਰ ਬੇਸ਼ੁਮਾਰ ਵਿਰਾਸਤੀ ਚੀਜਾਂ ਦਾ ਸੰਕਲਨ ਮੌਜੂਦ ਸੀ। ਇਸ ਮੌਕੇ ਹਰਨੇਕ ਸਿੰਘ ਨੇਕਾ ਅਤੇ ਪ੍ਰਬੰਧਕਾਂ ਵੱਲੋਂ ਪੁੱਜੀਆਂ ਸਖਸ਼ੀਅਤਾਂ ਨੂੰ ਸਨਮਾਨਿਤ ਵੀ ਕੀਤਾ ਗਿਆ। ਇਸ ਮੌਕੇ ਸਮਾਜ ਸੇਵਕ ਹਰਨੇਕ ਸਿੰਘ ਨੇਕਾ ਵੱਲੋਂ ਆਏ ਹੋਏ ਸਾਰੇ ਹੀ ਮਹਿਮਾਨਾਂ ਤੇ ਹੋਰ ਸਾਰਿਆਂ ਲਈ ਵਿਸ਼ੇਸ਼ ਤੌਰ ਤੇ ਖਾਣੇ ਦਾ ਵੀ ਪ੍ਰਬੰਧ ਕੀਤਾ ਗਿਆ ਤੇ ਆਸ-ਪਾਸ ਦੇ ਪਿੰਡਾਂ ਵਿੱਚੋਂ ਵੀ ਧੀਆਂ, ਭੈਣਾਂ, ਮੁਟਿਆਰਾਂ, ਬੱਚਿਆਂ ਤੇ ਬਜੁਰਗ ਮਾਤਾਵਾਂ ਨੇ ਹਿੱਸਾ ਲਿਆ।
No comments:
Post a Comment