ਮਹੰਤ ਲਤਾ ਸ਼ੇਰਗਿਲ ਨੇ ਪਿੰਡ ਚੈੜ ਦੇ ਲੋੜਵੰਦ ਪਰਿਵਾਰ ਨੂੰ ਲੜਕੀ ਦੇ ਵਿਆਹ ਲਈ ਭੇਂਟ ਕੀਤੀ ਸਹਾਇਤਾ

ਫਗਵਾੜਾ 24 ਜੂਨ (ਸ਼ਿਵ ਕੋੜਾ) ਭਾਰਤੀ ਸਮਾਜ ਅਤੇ ਸੱਭਿਆਚਾਰ ਵਿਚ ਸਦੀਆਂ ਬਲਕਿ ਯੁਗਾਂ ਤੋਂ ਕਿੰਨਰ ਇਕ ਅਹਿਮ ਹਿੱਸਾ ਰਹੇ ਹਨ ਪਰ ਅਜੋਕੇ ਸਮੇਂ ਵਿਚ ਕਿੰਨਰਾਂ ਦੀ ਪਛਾਣ ਸਿਰਫ ਵਿਆਹ ਜਾਂ ਔਲਾਦ ਦੇ ਪੈਦਾ ਹੋਣ ਸਮੇਂ ਵਧਾਈ ਲੈਣ ਤਕ ਸੀਮਿਤ ਹੋ ਕੇ ਰਹਿ ਗਈ ਹੈ। ਲੇਕਿਨ ਇਸ ਰਵਾਇਤੀ ਮਾਨਤਾ ਨੂੰ ਤੋੜਨ ਦਾ ਕੰਮ ਮਹੰਤ ਲਤਾ ਸ਼ੇਰਗਿਲ ਨੇ ਬਾਖੂਬੀ ਕੀਤਾ ਹੈ। ਲਤਾ ਸ਼ੇਰਗਿਲ ਜੋ ਕਿ ਇੰਟਰਨੈਸ਼ਨਲ ਹਿਊਮਨ ਰਾਇਟਸ ਕੋਂਸ਼ਲ ਕਪੂਰਥਲਾ ਦੇ ਪ੍ਰਧਾਨ ਵੀ ਹਨ ਉਹਨਾਂ ਪਿੰਡ ਚੈੜ ਦੇ ਇਕ ਲੋੜਵੰਦ ਪਰਿਵਾਰ ਨੂੰ ਲੜਕੀ ਦੇ ਵਿਆਹ ਲਈ ਵਢਮੁੱਲਾ ਸਹਿਯੋਗ ਦਿੱਤਾ। ਮਹੰਤ ਲਤਾ ਸ਼ੇਰਗਿਲ ਦੇ ਇਸ ਉਪਰਾਲੇ ਦੀ ਸ਼ਲਾਘਾ ਕਰਦਿਆਂ ਪਿੰਡ ਚੈੜ ਦੀ ਸਰਪੰਚ ਬੀਬੀ ਕਮਲਜੀਤ ਕੌਰ ਅਤੇ ਪੰਚਾਇਤ ਮੈਂਬਰਾਂ ਨੇ ਕਿਹਾ ਕਿ ਲਤਾ ਸ਼ੇਰਗਿਲ ਇਕ ਨੇਕ ਇਨਸਾਨ ਹਨ ਜੋ ਕਾਫੀ ਲੰਬੇ ਸਮੇਂ ਤੋਂ ਸਮਾਜ ਸੇਵਾ ਦੇ ਕਾਰਜਾਂ ਵਿਚ ਵਧ-ਚੜ੍ਹ ਕੇ ਹਿੱਸਾ ਪਾ ਰਹੇ ਹਨ। ਮਹੰਤ ਲਤਾ ਸ਼ੇਰਗਿਲ ਨੇ ਕਿਹਾ ਕਿ ਬੇਸ਼ਕ ਉਹਨਾਂ ਦਾ ਕਿੱਤਾ ਰਵਾਇਤੀ ਹੈ ਪਰ ਹਰ ਇਨਸਾਨ ਦਾ ਫਰਜ਼ ਹੈ ਕਿ ਆਪਣੀ ਸਮਰਥਾ ਮੁਤਾਬਕ ਸਮਾਜ ਦੀ ਸੇਵਾ ਵਿਚ ਯੋਗਦਾਨ ਪਾਇਆ ਜਾਵੇ। ਕੋਵਿਡ-19 ਕੋਰੋਨਾ ਮਹਾਮਾਰੀ ਦੇ ਇਸ ਸਮੇਂ ਵਿਚ ਆਰਥਕ ਪੱਖੋਂ ਗਰੀਬ ਤਬਕੇ ਦੇ ਲੋਕ ਬੜੀ ਮੁਸ਼ਕਲ ਵਿਚੋਂ ਗੁਜਰ ਰਹੇ ਹਨ ਅਤੇ ਅਜਿਹੇ ਹੀ ਇਕ ਪਰਿਵਾਰ ਦੀ ਸਹਾਇਤਾ ਕਰਨ ਦਾ ਸੁਭਾਗ ਉਹਨਾਂ ਨੂੰ ਪ੍ਰਾਪਤ ਹੋਇਆ ਜਿਸ ਲਈ ਉਹ ਪਰਮਾਤਮਾ ਦੇ ਸ਼ੁਕਰਗੁਜਾਰ ਹਨ। ਮਹੰਤ ਲਤਾ ਸ਼ੇਰਗਿਲ ਨੇ ਕਿਹਾ ਕਿ ਲੜਕੀਆਂ ਨੂੰ ਬੋਝ ਨਹੀਂ ਸਮਝਣਾ ਚਾਹੀਦਾ ਕਿਉਂਕਿ ਕੁੜੀਆਂ ਨੂੰ ਲਛਮੀ ਦਾ ਰੂਪ ਕਿਹਾ ਗਿਆ ਹੈ। ਉਹ ਆਪਣਾ ਮੁਕੱਦਰ ਲੈ ਕੇ ਆਉਂਦੀਆਂ ਹਨ। ਇਨਸਾਨ ਤਾਂ ਸਿਰਫ ਇਕ ਜਰੀਆ ਹੀ ਬਣਦਾ ਹੈ। ਇਸ ਮੌਕੇ ਪ੍ਰਕਾਸ਼ ਦਾਸ, ਕਪੂਰ ਕੌਰ, ਮਨਜੀਤ ਕੌਰ, ਰਮਨਦੀਪ ਕੌਰ, ਲਖਵਿੰਦਰ ਕੌਰ, ਬਲਵਿੰਦਰ ਕੌਰ, ਬਲਵੀਰ ਕੌਰ, ਸੱਤਾ ਬਣਿੰਗ ਚਾਚੋਕੀ, ਪਿੰਦੀ ਮੱਲ ਕੱਟਾਂ, ਪੂਰਨ ਕੌਰ, ਸਤਿਆ ਦੇਵੀ ਅਤੇ ਹਰਬੰਸ ਕੌਰ ਆਦਿ ਹਾਜਰ ਸਨ।