ਕਰਮਜੀਤ ਦਿਉਣ ਐਲਨਾਬਾਦ (ਆਰ. ਆਰ. ਰੇਡੀਓ 91.2 ਸਵਰਗੰਗਾ ਦੀ ਐਂਕਰ ਅਤੇ ਡਾਇਰੈਕਟਰ) ਨਾਲ ਮੁਲਾਕਾਤ

 

          ਅੱਜ ਕੱਲ ਆਰ. ਆਰ. ਰੇਡੀਓ 91.2 ਸਵਰਗੰਗਾ ਦਾ ਜਾਦੂ ਲੋਕਾਂ ਦੇ ਸਿਰ ਚੜ ਕੇ ਬੋਲ ਰਿਹਾ ਹੈ। ਇਸ ਰੇਡੀਓ ਦੀ ਐਂਕਰ ਅਤੇ ਡਾਇਰੈਕਟਰ ਸਾਹਿਤਕ ਤੇ ਸੱਭਿਆਚਾਰਕ ਹਲਕਿਆਂ ਦੀ ਜਾਣੀ-ਪਛਾਣੀ ਸਖ਼ਸ਼ੀਅਤ ਕਰਮਜੀਤ ਦਿਉਣ ਐਲਨਾਬਾਦ ਨਾਲ ਰੇਡੀਓ ਪ੍ਰੋਗਰਾਮਾਂ ਬਾਰੇ ਗੱਲਬਾਤ ਹੋਈ, ਜੋ ਕੁਝ ਇਸ ਤਰਾਂ ਰਹੀ :-

??-      ‘‘ਮੈਡਮ ਦਿਉਣ ਜੀ ਸਭ ਤੋਂ ਪਹਿਲਾਂ ਤਾਂ ਇਹ ਦੱਸੋ ਕਿ ਕੀ ਤੁਸੀਂ ਕੋਈ ਪੁਸਤਕ ਸਾਹਿਤ ਦੀ ਝੋਲੀ ਪਾਉਣ ਦਾ ਉਪਰਾਲਾ ਵੀ ਕਰ ਚੁੱਕੇ ਹੋ ?’’

00-      ‘‘ਲੁਧਿਆਣਵੀ ਜੀ, ਮੈਂ ਆਪਣਾ ਮੌਲਿਕ ਕਾਵਿ-ਸੰਗ੍ਰਹਿ, ‘ਚਿੜੀਆਂ ਦੀ ਚਹਿਕ’ ਅਤੇ ਗੀਤ-ਸੰਗ੍ਰਹਿ, ‘ਪਿਆਜੀ ਚੁੰਨੀ’ ਸਾਹਿਤ ਦੀ ਝੋਲੀ ਪਾਉਣ ਦੇ ਨਾਲ-ਨਾਲ਼ ਅੱਧੀ ਦਰਜਨ ਸਾਂਝੀਆਂ ਪ੍ਰਕਾਸ਼ਨਾਵਾਂ, ਜਿਨਾਂ ਵਿਚ ਸ਼੍ਰੋਮਣੀ ਪੰਜਾਬੀ ਲਿਖਾਰੀ ਸਭਾ ਪੰਜਾਬ (ਰਜਿ:) ਦੀਆਂ ਵੀ ਦੋ ਕਾਵਿ-ਪੁਸਤਕਾਂ ਸ਼ਾਮਲ ਹਨ, ਵਿਚ ਹਾਜ਼ਰੀਆਂ ਭਰ ਚੁੱਕੀ ਹਾਂ। ਇਸਤੋਂ ਇਲਾਵਾ ਅੱਡ-ਅੱਡ ਅਖ਼ਬਾਰਾਂ-ਮੈਗਜ਼ੀਨਾਂ ਵਿਚ ਵੀ ਲੰਮੇ ਅਰਸੇ ਤੋਂ ਛਪਦੇ ਆਉਣ ਦਾ ਸੁਭਾਗ ਹਾਸਲ ਹੋ ਰਿਹਾ ਹੈ।’’

??-      ‘‘ਆਰ. ਆਰ. ਰੇਡੀਓ 91.2 ਸਵਰਗੰਗਾ ਵਿਚ ਤੁਹਾਡਾ ਕੀ ਰੋਲ ਹੈ?  ਇਸਦੇ ਪ੍ਰੋਗਰਾਮਾਂ ਬਾਰੇ ਕੁਝ ਚਾਨਣਾ ਪਾਓਂਗੇ ?’’ 

00-      ‘‘ਆਰ. ਆਰ. ਰੇਡੀਓ 91.2 ਸਵਰਗੰਗਾ ਵਿਚ ਮੈਂ ਐਂਕਰ ਅਤੇ ਡਾਇਰੈਕਟਰ ਦੀਆਂ ਸੇਵਾਵਾਂ ਨਿਭਾ ਰਹੀ ਹਾਂ। ਜਿੱਥੋਂ ਤੱਕ ਪ੍ਰੋਗਰਾਮਾਂ ਦਾ ਸਬੰਧ ਹੈ, ਰੇਡੀਓ ਦੇ ਪ੍ਰੋਗਰਾਮ, ਰੇਡੀਓ ਐਪ, ਫੇਸਬੁੱਕ ਪੇਜ ਅਤੇ ਰੇਡੀਓ (91.2) ਖ਼ੂਬ ਸਫਲਤਾ ਪੂਰਵਕ ਚੱਲ ਰਹੇ ਹਨ।  ਸੋਮਵਾਰ ਤੋਂ ਸ਼ਨੀਵਾਰ ਸਵੇਰੇ ਦਸ ਵਜੇ, ‘ਗੱਲਾਂ ਤੇ ਗੀਤ’ ਪ੍ਰੋਗਰਾਮ ਪੇਸ਼ ਕੀਤਾ ਜਾਂਦਾ ਹੈ।  ਜਿਸਦੇ ਅਲੱਗ-ਅਲੱਗ ਰੂਪ ਹਨ।  ਸੋਮਵਾਰ ਨੂੰ ਕਿਸੇ ਵਿਸ਼ੇ ’ਤੇ ਗੱਲਬਾਤ ਕੀਤੀ ਜਾਂਦੀ ਹੈ, ਜਿਵੇਂ ਟ੍ਰੈਫਿਕ ਨਿਯਮ, ਰੁੱਖ ਲਗਾਉ, ਧਰਤੀ ਬਚਾਉ, ਪ੍ਰਦੂਸ਼ਣ ਆਦਿ।  ਇਸ ਦੇ ਨਾਲ ਹੀ ਸੱਭਿਆਚਾਰਕ ਗੀਤ ਵੀ ਸੁਣਾਏ ਜਾਂਦੇ ਹਨ।  ਮੰਗਲਵਾਰ ਨੂੰ ‘ਅਦਬੀ ਰੰਗ’ ਪ੍ਰੋਗਰਾਮ ਲੇਖਕਾਂ ਦੀਆਂ ਰਚਨਾਵਾਂ ਤੇ ਅਧਾਰਿਤ ਹੈ।  ਜਿਸ ਵਿੱਚ ਲੇਖਕ ਫੋਨ ਕਰਕੇ ਆਪਣੀਆਂ ਮੌਲਿਕ ਅਤੇ ਮਿਆਰੀ ਰਚਨਾਵਾਂ   ਸੁਣਾ ਸਕਦੇ ਹਨ।  ਬੁੱਧਵਾਰ ਨੂੰ ਪ੍ਰੇਰਨਾਦਾਇਕ ਕਹਾਣੀ ਸੁਣਾਈ ਜਾਂਦੀ ਹੈ।  ਵੀਰਵਾਰ ਨੂੰ ਹਿੰਦੀ ਫਰਮਾਇਸ਼ੀ ਗੀਤ ਸੁਣਾਏ ਜਾਂਦੇ ਹਨ।  ਸ਼ੁੱਕਰਵਾਰ ਨੂੰ ‘ਨਾਰੀ ਸੰਸਾਰ’ ਪ੍ਰੋਗਰਾਮ ਵਿੱਚ ਕਵਿੱਤਰੀਆਂ ਆਪਣੀਆਂ ਮੌਲਿਕ ਅਤੇ ਮਿਆਰੀ ਰਚਨਾਵਾਂ ਫੋਨ ਰਾਹੀਂ ਸਾਂਝੀਆਂ ਕਰ ਸਕਦੀਆਂ ਹਨ ਅਤੇ ਸ਼ਨੀਵਾਰ ਨੂੰ ਫਰਮਾਇਸ਼ੀ ਪੰਜਾਬੀ ਗੀਤ ਸੁਣਾਏ ਜਾਂਦੇ ਹਨ।’’

??-      ‘‘ਦਿਉਣ ਐਲਨਾਬਾਦ ਜੀ, ਕੀ ਇਸ ਰੇਡੀਓ ਤੇ ਪ੍ਰਸਾਰਿਤ ਪ੍ਰੋਗਰਾਮਾਂ ਵਿੱਚ ਸਰੋਤਿਆਂ ਨੂੰ ਵੀ ਹਿੱਸਾ ਲੈਣ ਦਾ ਮੌਕਾ ਮਿਲਦਾ ਹੈ ?’’

00-      ‘‘ਹਾਂ ਜੀ।  ਲੁਧਿਆਣਵੀ ਜੀ, ਸਰੋਤਿਆਂ ਨੂੰ ਵੀ ਹਿੱਸਾ ਲੈਣ ਦਾ ਮੌਕਾ ਮਿਲਦਾ ਹੈ ਅਤੇ ਵਿਜੇਤਾ ਘੋਸ਼ਿਤ ਕਰਕੇ ਸਨਮਾਨ ਵਜੋਂ ਸਰਟੀਫਿਕੇਟ ਵੀ ਦਿੱਤੇ ਹਨ।  ਰੇਡੀਓ ਵੱਲੋਂ ਇੱਕ ਪ੍ਰਤੀਯੋਗਤਾ ਕਰਵਾਈ ਗਈ ਜਿਸ ਵਿੱਚ ਰਾਜਵਿੰਦਰ ਕੌਰ ਜਟਾਣਾ, ਹਰਮੀਤ ਕੌਰ ਮੀਤ, ਸੁਰਿੰਦਰ ਕੌਰ ਧਨੋਤਾ, ਸੁਦੇਸ਼ ਨੂਰ ਮੋਦਗਿੱਲ, ਜਸਵਿੰਦਰ ਕੌਰ ਜੱਸੀ, ਮਨਜੀਤ ਕੌਰ ਅੰਬਾਲਵੀ, ਗੁਰਦੀਸ਼ ਕੌਰ ਗਰੇਵਾਲ, ਪ੍ਰੀਤਮਾ, ਸਿਮਰਨਜੀਤ ਕੌਰ ਸਿਮਰ, ਜਸਵਿੰਦਰ ਕੌਰ, ਤਰਵਿੰਦਰ ਕੌਰ ਝੰਡੋਕ, ਕੁਲਵੰਤ ਕੌਰ ਚੰਨ, ਡਾ: ਰਵਿੰਦਰ ਭਾਟੀਆ, ਅੰਜੂ ਵ ਰੱਤੀ, ਰਣਜੀਤ ਕੌਰ, ਨਿਰਮਲ ਕੌਰ ਕੋਟਲਾ, ਡਾ: ਨੀਨਾ ਸੈਣੀ ਨੇ ਆਪੋ ਆਪਣੀਆਂ ਰਚਨਾਵਾਂ ਨਾਲ ਭਾਗ ਲਿਆ ਅਤੇ ਇਸ ਪ੍ਰਤੀਯੋਗਤਾ ਵਿੱਚ ਅੰਜੂ ਵ ਰੱਤੀ ਨੇ ਪਹਿਲਾ ਸਥਾਨ, ਮਨਜੀਤ ਕੌਰ ਅੰਬਾਲਵੀ ਨੇ ਦੂਸਰਾ ਸਥਾਨ, ਤਰਵਿੰਦਰ ਕੌਰ ਝੰਡੋਕ ਨੇ ਤੀਸਰਾ, ਜਸਵਿੰਦਰ ਕੌਰ ਨੇ ਚੌਥਾ ਅਤੇ ਗੁਰਦੀਸ਼ ਕੌਰ ਗਰੇਵਾਲ ਨੇ ਪੰਜਵਾਂ ਸਥਾਨ ਹਾਸਲ ਕੀਤਾ।  ਰੇਡੀਓ ਦੇ ਡਾਇਰੈਕਟਰ ਕਰਮਜੀਤ ਨੇ ਸਭ ਨੂੰ ਸਰਟੀਫਿਕੇਟ ਦੇਕੇ ਸਨਮਾਨਿਤ ਕੀਤਾ ਅਤੇ ਪ੍ਰਤੀਯੋਗੀਆਂ ਨੂੰ ਮੁਬਾਰਕਬਾਦ ਦਿੱਤੀ।’’

          ਵਾਹ ! ਬਹੁਤ ਖ਼ੂਬ ਦਿਉਣ ਐਲਨਾਬਾਦ ਜੀ ! ਰੱਬ ਕਰੇ ! ਵੱਡਮੁੱਲੇ ਸੱਭਿਆਚਾਰਕ ਵਿਰਸੇ ਨੂੰ ਜਿਊਂਦਾ-ਜਾਗਦਾ ਰੱਖਣ ਅਤੇ ਇਸ ਨੂੰ ਪ੍ਰਫੁੱਲਤ ਕਰਨ ਦਾ ਤੁਹਾਡਾ ਇਹ ਸ਼ਲਾਘਾਯੋਗ ਕਾਰਜ ਨਿਰਵਿਘਨ ਨਿਰੰਤਰ ਜਾਰੀ ਰਵੇ, ਦਿਲੀ ਮੁਬਾਰਕਾਂ, ਸ਼ੁਭ ਕਾਮਨਾਵਾਂ ਅਤੇ ਦੁਆਵਾਂ ਹਨ, ਮੇਰੀਆਂ।  

          -ਪ੍ਰੀਤਮ ਲੁਧਿਆਣਵੀ (ਚੰਡੀਗੜ) 9876428641

ਸੰਪਰਕ : ਕਰਮਜੀਤ ਦਿਉਣ ਐਲਨਾਬਾਦ, 9467295003